अचानक चितवन यात्रा भरभत्तीम

अचानक चितवन यात्रा भरभत्तीम

                 का कनाहो समय के माग हो या बौरहापन, अचानक एकदिन का सुर चलल कैलालीक मनै चितवन सम जैना सल्लाह हुजाइठ उ फेन भरभत्तीम । होली मनलेक रातहो काहुँन रातभर फेन घरे आइ नै सेकजाइट । घरे बच्चा बिमाररहे मने, रातके अत्तरियक संघरियन पठाइ जैना अनि वस्तहिके रातके मट्कौनक ओ लिक्मासे आइल हमार पुर्खा कलाकार लोगनके हेरबिचार कर्ना जम्मा जिम्मा फेन हिरगरके अध्यक्षयक नातासे फेन जम्मा हेरचाह करना मोरे जिम्मा रहे ।  
एकओर सँस्कृतिक सँस्थाहुइलेक कारण यी कार्यक्रम कर्ना जरुरी रहे, कलेसे दोसरओर चुनोती महाधेरसे सामना कर्नारहे । दिमाक मोरीक ओ महिनसे धेरहमार गंगाराम डागौरा सरके रहिन ।  वस्टँहिके हमहिन सहयोग करुइया धेर संघरियन ते रहै मने सब अस्ते कचकच मचमच से दिमाग ढिकल रहट ।
जब भुरेभरसुन अद्ढा रात घरे ऐनुते जनिवा बरा घिनाहुन आरोप लगाके गैरिना सुरु करेलागल । घरे बच्चाबिमार बा अपनेजुन हाहाहिहिमन हेराइल कहठ । बिचरी करेफेन का मोर करमना अस्तहि बिल्गाइठ । मने मै ते सहे नैसेकके सुरेस के घर मोटिचोक रतिय अपन झोला झम्पट लेले निकरजैठु ले तोर रीस ओराइ तब ऐम कहिके । वमनहि सालीक छौकल बात याद ऐतिरहे भातु त्वहार बच्चा भारी कि कार्यक्रम ? हरे, भगवान मै काकरु एकओर संघरियनके काल्ह परिक्षाबा बाटिन, वइन जैसिकफेन घर छोरहिक परनाका तबमारे गारि नैपाके चारठो बाइकबा वमनाफेन तीन तीनजे बलजब्रे बैठके चलदेठी पठाइ, अढा दगर पुगलमन फोन आइल काकरु बिना पुगैले कैसिक ऐनाहो । ओ सस्स्रारबा ओ भैयानफेन बाटै कहिके अलिक मन हे सनत्वना ते दिँउ । परिस्थिति अस्ते रहे कैसिक मै बुझु या बुझाउ रीसटे सब ओर करियइ देखठ ।
    रातभर सुरेस के घरेम सुटल रठु, घरेक याद आइल का करनाहो अब । महि नैसमझपैठु कि आउरजे समझ नैदेठै । का करनाहो एकसे चलठ नै दुइ से बनठ नै कहेहस हुगिल । यी दुनियम समाजिक काम करना कलेक लोहेक चिउरा खैना जटना कर्रा बा । खाउटे चगरा नैजिना नाखाउटे यी पेट खाली ।
महिँ गल्टी टु कहिके बिना बोल्ले अपन घरसे चलदेठु । अचानक सल्लाह हमार फेन हुजाइठ चली नारायणघाट घुमे संघरियन बलाइटै कहिके । रीसाइल मन मै फेन चली कहिके अचानक सल्लाहफेन जोरके बनजाइट । दुनुजाने बिहान्ने जाब कहिके तयार हुइठी वहा लमहि शिवहरि गोतयारके वहाँ कलुवा खाब कहिके कठि मने सुरेस थारु पसलमन काम करना मनै साहुजुन अब्बा अइम कहिके गौरी फन्टा चलजाइट आस लागत लागत ते कलुवा यहैँ बिगरजाइट । करिब चार बजे अत्तरियासे नेगाइ बल्ल हुइट ।  भरभट्टी चलुइया पाके मैभर बैठजैठु । बरा मीठ मीठ कल्पनाकरती नेगजैठी । कर्णालीक ढीक्वम पुगके कलुवा नैखाइल दुनहुनके पेट मच्छी ओ एक एकठो रेडबुल खाके कुछ टागट आइहस लागट । प्रेसके गारी हो कहटि जेहोस हमार गारी भर कहुफेन इन्ट्री नैकराइकपरल टे यात्रा अलिक जल्दी हुइल । रात जुन इहे कोहलपुरके बनुवैम हुइनासुरु हुजइट । दांगके गोत्यार जुन अस्रा लागल रठै कहाँ पुग्ली कहति फोन करौ । हमार मनमे जुन अलिक डरफेन लागेहस करट चोरडाँका नामिलैयार, रात हुगिल यहाँ बनुवक नावे चोरमारा काका नाँउबा झन डर लागेहस करट । जा रलेसेफेन गारिक रप्तार लगातार एकतारसे एकतार मचलरहट । काने पोंगपोंग करके सुनलागत मुहेम सब झुनझुन्नी पकरलहस लागठ । गोतयार जुन अपन बाइक लैके पिपरी चोकमन इन्डीकेटर बरले जहाँ बरलदेख्वी वहाँ रुक्बी कहिके  अस्रा लागलरठै ।  करिब दश बजे बिचार शिकार भात खवाके सुतैठै । कलुवाफेन नैखाइल पेट तीन अघाला लै लै खाजाइट । दोसर बिहान्ने फेन चलडेठी । लगातारके गारीक बसाइ हुइलेक मारे चुटरेम फोक्टा पर्नाहस बट्ठाइट । कबु इ कबु ऊ करटी चुट्टर बडलबडल बैठजाइट । पहारेह यात्रा मने ज्यारलेसे फेन चिनवन के मैगर कुछ खास याद ओ कोइ संघरियानसे फेन पहिल भेंट हुइना वला रहे उहे सम्झटि यात्रा निरन्तर हुइटि रहठ । उहे समझके चुटरेक पिडा कम हुवे । वहाँ भान्जनके जुन कलुवा पकाके अस्रा लागल रठै । बल्ल टल्ल नारायण घाट पुगठी टे जम्मा भुटला खेख्नार रहठ टब भुट्ला कटैठी टे भान्जा हमहिन वहै लेहे ऐठैँ । जाके लहाखोरके खाना खैठी ओ गडडाहुइल ठाँउम बैठठी काहेकी गँडढुढढुरके जम्मा हौस पुगल रठिस ।
खाना खाके मैटे म्यासेजमन संघरिया अपनेहे भेंटे जाइटै जरुर भेँटबी कहिके अपनही म्यासेज करठु ओ अपरिचित मनैन कठु । टब अपनहि संघरियइ एकठो  गिफ्ट किनडी कहिके कठु ओ लैके अस्पटालके २ नं. गेटमन जेठु । जब महिन फोन आइटटे मोबाइलके माइक बिगरल बा कहिके एस एम एस करेक कठु काहेकी ऊ संघरिया कोइ आउरजे नै रहिके महि रठु अवाजटे चिन्ह जाइट टबमारे बहाना ऐसिन बनट । मै डगरम अस्रा लागल रठुँ, अलिक अलिक जिउ ढकढकाइठ मने फेनसे भेँट करठु । ऊ फेन भेँट करे अइली  बिचारी मुहे भरके पसना देखठु टब अपन अन्टीक घर लैजैठै । निखोरल केरा, निखोरल सुन्तला अंगुर आइट,  पानीक ठाँउमन इस्प्राइटके गिलास आइट । महिनटे कहाँजुन आइलहस लागट । ऊ मेडम उ अस्पटालके सुपर भाइजर रठी टे थरुवा पहिले हमारे ओर सेभ ड चिलरेन कना सँस्थाम काम करेबेर हमार ठाँउओर आइल कठी । जे होस फेसबुक से बनाइल संघरियनसे फेन अटना धेर आत्मीयता सँटेमिल्लेकमन  खुशि लागट ।
हमार रलेक दोसर दिन बरा भाग्येसे नारायणघाट बजार बन्द रहट कटि टब सक्कु अस्मीत भातु ओ भान्जक  दुकान बिदा रलेक कारण गैँडाकोटके मौलाकाली मन्दिर घुमघाम करना साइट बनजाइट । बिहान्ने सबजे उटटीकिल लहाखोरके सुरेस , अस्मीत, प्रमोद भान्जा ओ मै सबजे एक्के बाइकमन त्रिपल चलदेठी । तराइमन कम नेँग्ना मनै परजाइट पहारके यात्रा पस्ना खलखलहेँक निकरे लागठ । फोटो खिचटी पहार के टुप्पामनिक रहल मौलाकालिक दर्शनफेन करजाइट । आइबेर हडहडैटी ओ छलछलैटी ऐठी मने सबसे छलछलहाहस हमार सुरेस करै । वहाँसे आके कलुवा बिचारा भान्जा ओ भातु पकैठै हम्रे जुन हात्तीसार घुम्ना योजना बनैठी । फोन मन झुलल उहे डक्टरिन्यन फेन खेल्वार करटि चलि कठि टब प्रतिभादिदी सुनके बरा खुशि हुइठी मने एकठो डक्टरिन्या जुन नैजैनाहस करठी मै जोर करनुटे ऐली । बिहान चार रलेसेफेन साँझके छ जाने हुजैठी । मने बठिन्यन खोब चौबिस कोठिम आस लगवैठै । जेहोस ढीलै हुइलेसेफेन गारीम बैठके चलदेठी । मने काकरनाहो भेदभाव सुरु हुइलहस लागट । लवन्डीन जेकरटे अस्रा लगली वइने हमहिनसे एक अँखरातक नैबोल्के यात्रा हुइट । हमार फेन नाहडहडाइ बन्ना नाहि मजा बाते निकरना भैल अब सत्यानास । जैसिक तैसिक पुग्ठी तब हाँथीनमन चहरना बात चलत । मै बाहेक सब लवण्डन नैचहरना ओ लवण्डीन चहर्ना जिड करेहस करटी हाँथीक टिकटके लाग खोब बारगेनिंग हुइट । एक ठाँउ भाउ नैबनट टब एकठो थारु भैयैँइ देख्ठी टे उहीन चुप्पेसे बाहर बलाके रेट पुँछठी टे ऊ हमहिन मँहगा लेहटा कहिके बटादेहठ । टब कठि ज्या रलेसेफेन जात भितरफेन कुछ नाँतारहत काँहुन । दोसर ठाँउसे टिकट कटाके गारीम बैठके हाँथीनथन छोरडेहट । जस्टेके हाँथीम बैठाइ हुइट वस्तहि आँधि सुरु हुइलागठ । मन कहट कप्पारीम रुखवा गिरेपाइटे उहैँ शहिद बनजाब । पानी फेन सिमसिम सिमसिम आइलगठ टब कठि कैसिन साइटमन ऐली यार जिवनके पहिलबार टे हाँथीम सवार करेमिलल आझु इ आँधि आइक परठुइहिस । एक हाँथीम परजाइट पाँच जाने बैठना यहाँ साँस फेरना फेन कररा परना । मने अलिक फाइदा कनाहोकि का कनाहो लजैना मनैफेन हिटिकके बैठना बध्यता उहे हाँथीया बनाइल । हँथियक उप्पर जिस्कटि खैना खैथी जिस्का जिस्का । तब सँन्झाके घरे आजाइठ । आय बेरफेन अलिक रात हुइ लागट टब भातु कठैँ नाँस्ता खाइ जाइ टब बाइकमन पठाइ जादेब । सँगे सबजे सिकार खैठै मैभर भगत । पहिल परिचय हुयलमनै ऊफेन रात जस्ते हुइतजाइत वस्तहि वैने डेरैठै वमनहिँ खाना कैसिन कैसिन हुइना डरसे अलिक शंका करठै । ज्या रलेसेफेन बाइकके लाइसन्स मोथन किल रलेकमारे रातके पठाइजैना बध्यता हुइट । पानी से भिजत भिजत पठाइ जैठु जम्मा भिजजैठी तिन्यौजे । प्रतिभा दिदीक दुकान बन्दहुइगिल रहठ टे अस्पतालके एक नं. गेट बाहेक जम्मा बन्द हुगिल रहे । मै भित्तर पेलके भुलाजैठु अब अपन डेरा जाय जानम किनाइ कहिके चिन्ता । मने जेहोस आइ जानलेनु । कुछ याद मैगर बनल टे कुछ बाँउ छुटल । फोनिराम सर वइने बिरगंज राजेन्द्रमहतोँ सर भेँटकरि कटि कटि समय साथ देहेछोरे लागल धनगढीसे फोन ओ अपन कामफेन हेर्ना हुइलागल टब चाहकेफेन नेताजिसे भेँतकरना भर अधुरा रहिगिल ।