पुर्खानी गहना

पुर्खानी गहना

डाई डाई करटी रिता डौरटी अईठिन।रिताक डाई फुलरानी का हुईटा रि बघुवाईल हस करटे कली। इच्छुक मनसे रिता पुछ्ली डाई पुरान गहना का का बा परौं गुर्हि हो मोर सखि हुक्रे सबकोई गुर्हि असराई जाब कहटै। डाई कहलिन अत्रा बरस बेगर गहनाक गुर्हि असराई टिहिस असौं काहे चाहल।रिता जिड करटी डाईसे पुरान गहना का का बा डेखा मोर सक्कु सखि हूक्रे अपन अपन डाईनके पुरान गहना घालके गुर्हि असराई जाईटै मै कुछ नि महिन लाज नाई लागि? छाईक जिडसे ऊ अपन भौका छोर्लि भौका मन्से भोज्हा ४ रवाक फेंफी/फोंफी, बुलाका ओ झुम्का निकर्लिन। रिता अटरै कटि फुस्सर ढेवर लगैलिन। फुलरानी कलि सबकुछे रहे छाई टोर बाबा बिगार डर्नै यी टो टोर लग बिलारीक गुह हस नुकाके बचल बा यकर कारण कटरा मार गारि पैनु। चाँदीक गहना टोर बाबा बेच डर्नै। भर्खर आझकल टोर बाबा सुढरल बाटै बर हुके पक्कै मङबे कहिके बचैले आटु। घोघेटके रिता कलि यी का करू सबकोई आझकल पुरान चाँदीक गहना घल्ठै मै फेंफी बुलाका चाटु।फुलरानी छाई हे सम्झैटी कहलिन टोर लग बचैले आटु टै मन नाई पराईठुस काल्ह सोलरक डुकानके जाब झुम्का मोर चिन्ह बचैम आजकल कोई फेंफी बुलाका लगैबे नाई करठै यिहिन बेचके ओ टोर बाबा पठाईल पैसा ठापके टुहिन जा चाहि चाँदीक लैडेम।
पुर्खानि गहना बिगर्लि सेकलसम बनाईक बचाईक परि टोर बाबा आझकल खुब पस्टैठै बुद्धि बिगरल गहना बेच डर्नु अब ढिरे ढिरे सब जोरम कठै। जा अपन सखिन संग करे काल्ह बजार जाब। रिता खुसी हुईटी अपन सखिन बजार जैना संग करे जैठिन।
#असिराम डंगौरा
जोशीपुर ५ सिमराना कैलाली
•••••••