फुस्सर_ढ्याबर

फुस्सर_ढ्याबर

टिन टल्ह्याँ घर गाउँमका सबसे बरा घर डंग्यान घर । थारु चलनम घरक नाउँ रना चलन बहुट अघट्यसे चलल रिट हो । एक हिसाबले कना हो कलसे थारुक पहिचानफे हो । पुर्बक पंजार डब्लाहान घर सर्कक पछिउ पजार डंग्यान घर डखिन ओहर भैसाहान घर संग सांढ ज्वाटल घोङ्टाहान घर डान्चे डाखिन भर झर्नहिया । झर्नहियक आउर डखिन लोहारपुर, पर्बाटिपुर गाउँ सुजि, लोहार, बड्या हुकहनक बसोबास हुइलक कारनसे लोहारपुर नाउँ ढैगिल आसकाल भर गोट्का चारिक थारुनक घरफे डेख मिल्ठा । अघट्यक मनै केक्रो बाबा पाहार बन्कस काट गिल ब्याला यहोर छावा जर्मलसे पहारु । बाबा कहु बजार गिल ब्याला जर्मलसे बजारु । या त अट्वार जर्मलसे अट्यारी । बुढक डिन जर्मलसे बुधरानी अस्ट अस्ट नाउँ ढर डेहट । वस्टक घरक नाउँफे और ठाउँसे टसक आइल लौव घरक नाउँ फे मिल्ना मेरिक ढर डेठ ।

थारु गाउँम डंग्यानघर भर पर्बट्यक घर हो । पर्बटिया अठार बीस बरस आघ पाहारम सक्कु घर पहिरो लैगिलिस ट तराई झर्लक हो । डागी थारु हुइलक कारनसे गाउँक मनै डंग्यान नाउँ ढर डेल । ओसिख ट आसकाल केउ केउ नेटक घर, टावर वाला घर कैखफे चिन्ठ । घर टिन टल्ह्याँ हुइलक कारनसे घरक छतम टेलिकमक टावर ढरल बाटिन । डंग्यान छवि बड्डो थारु हुकहन संग उठबस करट करट थारु भासा वर लिरौसिसे ब्वाल जान्ना होस्याकल रह । पह्र्ल लिखल हुइलक कारनसे स्वाझ थारुनक मन जिट्ना ट्याम नि लग्लिस् । आब ट बड्डोह गाउँक जन्ना सुन्ना मनै जो मन्ठ । बड्डोक डुइ ठो छावा काठमाडु पह्र्ठिस्। “हाठिनक खिना दाँट ओ डेखिना डाँट अल्ग अल्ग रठिन” कह हस समाजसेवाक नाउँम स्वाझ थारुन ठाग्क भिट्र भिट्र बहुट सम्पटी जोरसेक्ल रह । सम्पटिक संग डुस्मनफे ढ्यार कमाइल रह । गाँउम टिन बरस महट्वाफे चलाईल। पाछ बडा अध्यक्ष होगिल । छवि नाउँ रलसेफे बड्डो मन ढिगुल रहिस। “ल्वाभक भाँरा कहिया भरी” डंग्यान बड्डो बहुट रुप्या कमा सेकल रह । कोहोलपुर एक ठो बर्का भारी रज्वक डरबार हस घरफे बनासेकल बा रह । डिन, अठ्वार, पाख, महिना कर्टी साल कट्ना कट्रा डिन लागि ।

आसकाल गाउँ पालिक सब्से ढनी मनैक नाउँम परट । एक डिनक बाट हो । गाँउक नाउँम आइल बजेट घुस खिलकम अक्तियार पकरलेलिस । डुस्मन ढ्यार हुइलक कारनसे जेलम डर्वा पाजाईट । कुछ साल पाछ जेल जिन्गी काट्क आईट । डुनु छावन हमार बेज्जट करल कैख बड्डोसे अंश माग लेठ । ओ बड्डोह घरमसे निकारक मट्लब नि कर्ठ। रहल घर सम्पटी सब छावन लैलेठिस । डंग्यान बड्डोह स्वाझ थारुन ठग्लक पाप लागल हुइहिस सायड । अट्रा ढ्यार पैसा कमाईल क्याकर लाग कमाईल । आज गालम हाठ लगाक पुरान डिन सम्झटी फुस्सर ढ्याबर बिल्टैटि बृद्धाआश्रम मुना डिन गन्टी बैठल रह ।

#डियर_अबिरल
२०७८ जेठ २२ सनिच्चर