रीन

रीन

रिन

लौघर्या अटो रिक्सा मच्कैटी हमार होट्लिम पुगठ। डु चार ठो संघरेनके बगाल फेन जुट जाइठ। किउ जाँर भरैना कठ ट किउ ओर्सि बनैना। लौघर्या जुन्हुक “आझुक खाइल पियल सक्कु बिल महि भरम” कहठ। “आसकल गोल्ड सिकरठ नै पिठु सुर्य सिकरठ किल पिठु, घरक चुहाइल डारु नै पिठु बियर क्वाटर किल पिठु” उस्काई सक बट्वाइटह लौघर्या। गाउँम लौव घर बैसलक कारन घरक नाउ लौघराने हुइल हो। गाउँ म सक्कु जे लौघर्या कैक चिन्हिस।

किस्टा म रिक्सा किन्लक पैल्ह पैल्ह ट खोब कमाही हुइलिस मने ओह रिक्सक कमाइल पैसा यक यक मैन्हम किस्टा नै डेके बेन्सेक डिन्क डुइ चार हजार कमाइल पैसा फेन संघरेन म उरा डिह।

मै मन मने खोबसे सोँचु “डिन्क अट्रा ढिउर ढिउर पैसा उठाइट सन्झ्यक यक बोटल बियर ओ सिकार लान्क पि लिहट ओ बाँकी रुप्या किस्टा किस्टा म टिर डिहट। यक डु बरस पाछ ट उ रिक्सा फेन आपन वकर कमाही फेन आपन”। चार पाँच मैन्ह लौघर्यक अस्टहक बिट्ठिस।

छ मैन्ह सम्म किस्टा नै टिर्लक कारन सोरुमसे हाल आइ लग्ठिस। जसिक टसिक डु चार मैन्ह टार डिहठ।
“आजसे किस्टा हर मैन्हम डिहम” कहटी यक बरस होरलिस टभुन सम्म किस्टा नै टिर्लस।
डेर्ह बरस पाछ वकर रिक्सा लिह बेर डिहल आढा रुप्या फेन भुस और अटो फेन भुस।
अटो किनक लाक जुटाइल रिन आब लौघर्या कसिक टिरु कैक सोच्टी आपन जनेवा लैके पर्डेस कमाय गैल सुनमिलठ।
ठेकाना :- जानकी गाउँ पालिका २ खर्गौली, कैलाली