गन्जुवा

गन्जुवा

टुहिन स्वाझ पाके लुटक खोज्ठै
टुहार सर सम्पति हप्कक रठै
टुँ जुन चुपचाप रठो वइनके झन
हिम्मत बहरटी जाइटीन टुँ बाट
करे ब्याला डरैठो अक्मकैठो आपन
अढिकार मागे ब्यला पाछे पछ्गुर्ठो

उ चलाख बा टुहिनसे बहुट चलाख
टुहार हंक अढिकार डब्टी बा
टुहीन नोकर बनाइक लाग बा
टुहिन ठारु कैके हेप्टी बा
टु जुन चुपचाप बाटो लाट
मनै जस्ह गालम हाठ ढार्के

टुहार नेहेग्गा चोलिया भेगुवा
सुटीया टरीया नठिया डेख्के
खिजुवाइटा छिनक ला बा
बगाइक ला बा जराइक ला बा
सक्कु पुर्खा मेटाइक बा

कब जग्बो कब बल्गर हुइबो
टुहार पहिचान गोर्हाइटा बचाउ
कहटा टुँ नाइ सुन्ठो कि सुनक
बुढी नाइ कर्ठो कि पहिचान
बचाइक डराइटो हा टुँ “गन्जुवा”
….
लेखक : सुरज अखेल
राजापुर २ बरगदही, बर्दिया
हाल : सुर्खेत