बोक्सीन मनै

बोक्सीन मनै

सुशीला चौधरी कञ्चनपुर

 का मनै बोक्सीन रठै ?

गैल अगहन ११ गते बोक्सीनीयाके आरोपमे चरम यातना भोगल एक पिडित महिला राजकुकारी राना यी संसारसे एकदमके लाग बिदा हुइली । ३ बरष आगे अपने परोसीसे मुनासम यातना पाइल राजकुमारीके आर्थिक अभावके कारण पूरा उपचार हुइ नइ सेकलमे बार बार उहाँ बेराम परटी रहना उहाँके छावा दरबारी राना बटैले रहिट । राजकुमारीहे उहाँके परोसी बोक्सीनीयाके आरोप लगैटी योनी ओ मलद्घारमे लठ्ठीे ठेल्के गुह खवाके देह भर गुह पोत्के चरम यातना देले रहिट ।
बोक्सीनीयाके नाउँमे एकठो मनैया दोसर मनैनहे असिन कररा नइ मजा व्यवहार कैसिक करे सेकी । चाहे उ आपन दुश्मन काहे ना रहे बच्ना अधिकार सक्कुहुनके रहठ । कोइ केक्रो बच्ना अधिकार लेहे नइ मिली, मने एकठो बुह्राइल राजकुमारी टे पिडकहुकनके नातपात रहिट । फेन उहाँ उप्पर असिन क्रुर निर्दयी व्यबहार काहे हुइल ? जेकर कारण उहाँ आज हमार ठन एकदमके लाग बिदा हुइल बाटै । यी टे एकठो उदाहरण किल हो । असिन टमान राजकुमारी बाटै जौन बोक्सीनीयाके आरोपमे यातना भोग्टी बाटै । रुढीबादी परम्परा ओ अन्धविश्वाससे अभिन उम्के नइ सेकल हमार समाजके बहुट जैसिन मनै राजकुमारीके मौटसे सकारात्मक बाटै । मोर बुझाई अनुसार उहाँहुकनके बिचारमे एकठो बोक्सीनीयाके मौट हुइल बा । आब कुछ हदसम मनै बेराम परना क्रम रुकजाइ रे । एकठो अवला नारीके मौटमे मनै खुशी हुइना केक्रो मौट हुइलमे मनैहुक्रे आपनहे सुरक्षित महशुस करना हमार समाज आजके २१ औ शताब्दीमे फेन कत्रा पिछरल बाटै कना बात हमरे सहजुलेसे अनुमान लगाइ सेकबी ।
मै गाउँमे हुर्कल लौण्डी, बोक्सा बोक्सीनिया भुतप्रेत जैसिन बात बच्चैसे सुन्टी आइल बाटु । छोट रहु टब्बे मै स्कूल पह्रु । उ बेला मोर मनमे मनै बोक्सीन रठै कना एक प्रकारके गलत छाप परल रहे । डाई बाबा, बुडी बुडु, काकाकाकीलगायत छरछिमेक जिहीसे फे बोक्सीन रठै, मनैनहे सटैठै, ज्यानफे लेठै कना सुनु । मने मै ठोरचुन फरक खालके बाटु । कौनोफे बातके प्रमाण खोज्ठु मै । टबेमारे मनै कैसिक बोक्सीन हुइठै, कैसिन मनै बोक्सीन रठै, काहे बोक्सीन हुइठै ओ काहे औरे जहन बिना कामके दुःख देना चाहठै कना बारेम जिज्ञासा हुइटी रहे ओ मै बोक्सीनके प्रमाण खोजे लग्नु । मनै कठै बेराम हुइलेसे अस्पताल जैबो कलेसे डक्टरुवा रोग लागल देखाइठ ओ धामी, झाँक्री व गुरुवनहे देखैबो कलेसे भुतप्रेत या बोक्सीनीया लागल कठै । आखिर रहस्य का हो यी बोक्सीनीयाके ? मै आपन खुल्दुली मेटैना चाहु ।
आजसे करिब ३ बरष पहिले एक दिन मै अङनामे बैठ्के भात खाइ टहु । ओहे बेला बोक्सीनिया आरोप लागल जनेवा नाउँ बदलल (जुगमानी) हमार घरक नलका (धारा) मे पानी पिए आइल, घरक सक्कुजे महिन टठ्यक भात लेके घरक भित्तर जा । नइ टे यी बोक्सीनीया टोर कौरा बार लुट्ली आउर टै बेराम परजिबे कहिके घरभित्तर पठैनै । कौरा लिल्ली रे ? का कलो असिन, मै नइ बुझ्नु कहिके प्रश्न करलमे उहाँहुक्रे कलै, जल्डी भित्तर जा नइ टे यी बोक्सीनीया जनीवा कौरा लुट्ली कलेसे टुहिन भुख किल लागी मने भात नइ रुच्बे, भात टे यी बोक्सीनीया खादी आउर टै बेरामसे सुखैटी जैबे । उहाँहुक्रे असिन कहलमे महिन आउर जन्ना मन लागल बोक्सीनीयानके जादु मन्टरके बारेम । मै घरभित्तर नइ गिनु आउर टे जुगमानीहे आपन लग्गे बैठे कनु ओ उहाँसे गफ करटी भात खैनु । मने आज सम मोर कौरा लिलल मोर पटा नइ हो ।
एक दिन मै एकफल्ही बेहोस हुइल रहु । अस्पतालके रिपोर्टसे मोर शरिरमे पानीके मात्रा ओ रगत कम होके मै बेहोस हुइल देखाइल । यहोर घरम भर महिन पता नइ देके गुरुवाहे आछट् पाटी हेरे केलै काहेकि धामी झाँक्री गुरुवा भर्रामे मै विश्वास नइ करठु । गुरुवा का कहल कलेसे मोर डाईहे टोहार छाईकपर बोक्सीनीयाक आँखी लागल बटीस । बोक्सीनीया खाइ खोजटा टोहार छाईहे मने चिन्ता ना ली मै बचैम टोहार छाईहे । पाछे मै पता पाके डाईहे पुछ्नु महिन खाई चहुइया बोक्सीनीया के हो डाई ? डाई कहल उ टे गुरुवाहे पटा हुई । उहाँहुक्रे किटान करके कहे नइ मिली काहेकि बिरोधी हुई । महिन पता बा मै अस्पतालके बिरुवा ओ खानपिनमे ध्यान देके मोर स्वास्थ्य अवस्थामे सुधार हुइटी रहे । एक दिन मै ओहे गुरुवा बुडुहे डग्रीम भेट हुइनु टे उ गुरुवा मोर हाल खबर पुछल । उ मै चोखाइल देख्के खुशी हुइटी कहल हेर बाबु उ बोक्सीनीया टुहिन खाइक खोज्ले रहे । मै टुहिन उहिसे बचैनु । मै जियलसम उ बोक्सीनीया यी गाँउहे कुछ करे नइ सेकी । मै पुछ लेनु बुडु उ बोक्सीनीया के हो ? बोक्सीनीया कहिके टिगाके कहे नइ मिलट, बुडु कहलै । लेउ बुडु टुहिन पटा बा कलेसे कहे काहे नइ मिली टे ? कि टु ओस्टे उ बोक्सीनीया लागल हो कहिके कि कहटो कैके कनु टे उ झोक्काके कलै मै काहे ओस्टे कहम । मै उ बोक्सीनीयाहे मजासे चिन्ठु । चिन्ठी कलेसे बटाउ ना बुडु के हो उ मै फेन कलु । कहे नइ मिलट कहिके उहाँ महिनसे रिसाके चलगिनै । असिन निमुखा मनैनमे लगैना बिना प्रमाणके लाल्छनाके उदाहरण अब्बा हमार समाजमे टमान बा ।
अगर जत्तिक बोक्सीनीया रठै कलेसे काहे गुरुवा, भर्रा, धामी, झाँक्री नाउँ टिगाके फलाने बा बोक्सीनीया कहिके कहे नइ सेक्ठै । काहे उहाँहुक्रे बोक्सीनीया हो कहिके कहक डरैठै । मोर सुनल अनुसार बोक्सीनीयाके लाल्छना लगैना ओ बोक्सीनीयाके नाउँमे किहुहे फेन दुःख देलेसे कानुनी सजाय भोगे परना हुइलक ओरसे बोक्सीनीया कहिके टिगाके नइ कठै मनै हु । अगर आपनसंग बोक्सीनीया हो कहिके प्रमाण बा कलेसे काहे कानुनसे डरैना । महिन लागठ अपनेनके बोक्सीनीया रठै कहिके विश्वास करठी ओ हजुरहुकनसंग बोक्सीनीयाके विरुद्ध प्रमाण फेन बा कलेसे कानुनसे डरैना कौनो आवश्यक नइ हो । हिम्मत करके फलाने बोक्सीनीया हो कहिके नावइ टिकाडी अन्धविश्वासके भरमे केक्रो मानहानि हुइना मेरके किहुहे शारिरीक ओ मानसिक दुःख देना अमानवीय व्यबहार करना किहुहे अधिकार नइ हो ।
हमार समाजमे अभिन चेतनाके स्तर बृद्धि हुइ सेकल नइ हो । मनै जत्राफे शिक्षित काहे नइ रहिट मने फेन ओकर सोचाई अभिन परम्परागत बा । आजके २१औै शताव्दीके आपनहे आधुनिक कहुइया मनै फेन मनै बोक्सीनीया रठै कना भ्रमसे अछुट रहे नइ सेक्ले हुइट । समाजहे शिक्षित बनैना सबसे गरिमामय पदमे रहल शिक्षक ओ मनैनहे रोगसे बचाके लाव जिवन देना कुछ डाक्टर समेत बोक्सी नइ हुइट कना भ्रमसे निक्रे नइ सेकले हुइट । यी बातके प्रमाण मोर संग बा । डाक्टरहुक्रे चेकअप कराइ गैलेसे, मै यी बिरुवा लिखदेले बाटु । अपने यी बिरुवा खैबी आउर गुर्वाहे फेन देखा लेबी । काहेकि हमरे टे रोग किल ठिक करुइया हुई, डायन बोक्सीनीया लागल बा कलेसे बिरुवासे काम नइ हुइ । टबेमारे गुरुवाहे फेन एकचो देखैलेसे मजा हुई कहिके महिनहे स्वयम कले बाटै । शिक्षित कहल हमार समाजके डाक्टर, मास्टरहुकनके सोचमे अभिन परिवर्तन आइल नइ देख्के दुःख लागठ ।
मनै लवाइ खवाइमे जत्रा फेन आधुनिक हुइलेसे फेन सोचमे भर अभिन परम्परागत बा । अगर हमार समाज बदल्ना बा कलेसे लवाइ खवाइ किल नइ हमार सोचमे परिवर्तन अइना जरुरी बा ।