हिरगर साहित्यिक बगाल कैलालीसे ढुरहेरी टिहुवारके अवसर पारके फगुई कार्यक्रम तथा नियमित साहित्यिक श्रृंखलाके ४५ औं भाग शनिच्चरके रोज उसरल बा ।‘भाषा, कला, साहित्य ओ संस्कृति हमार पहिचान, संरक्षण संवद्र्धन कैना हिरगर बगालके अभियान’ कना मूल नाराके साथ तीन दिने फगुई कार्यक्रम ओ साहित्यिक कार्यक्रम करगिल हो । हिरगर बगालसे चीर डुंग्ना कार्यक्रमसहित धनगढी उपमहानगरपालिकास्थित धनगढी गाउँ, जाली, हसनपुर, क्याम्पस चौक, सद्भावना टोलस्थित थारु बुद्धिजीवीहुकनके घर–घरमे जाके फागुवा पह्रटी फगुई कार्यक्रम करल रहे ।
करिब ५० औं यूवायुवतीहुकनके सहभागितामे एक्के मेरक पोषाक लगाके फगुई कार्यक्रम करल बगालके अध्यक्ष हिरालाल चौधरी जानकारी डेलै । हिरगर बगालके यी चौठौं नियमित वार्षिक फगुई कार्यक्रम हो । यहेबीच हिरगर बगालसे धनगढीके शिवनगरस्थित परिवार बालगृहके अनाथ बालबालिकाहुकन स्टेश्नरी सामान फेन वितरण करगिल बा । शैक्षिक समाग्रीमे कापी, पेन्सल, कटर, कलर बक्स, किताब रहल जनागिल बा ।
फगुई अन्तरगतके उसरल चुक्की कार्यक्रमके बरका पहुना राष्ट्रिय जनता पार्टीके केन्द्रीय सदस्य फोनीराम चौधरी रहल रहिट । उहाँ राज्यसे टीकापुर राजबन्दीहुकन तत्काल रिहाई करके थरुहटके माग सम्बोधन करेक पर्ना माग करल रहिट । सांसद रेशम चौधरीहे बिजयी हुइल प्रमाणपत्रसहित शपथ ग्रहण कराइक पर्ना उहाँके कहाई रहे । कार्यक्रम बगालके अध्यक्ष हिरालाल चौधरीके घरगोसियाईमे हुुइल रहे ।
