करिब करिब सक्कु तयारी हुसेकल

टीकापुर,२८,चैत
हिरगर संवाददाता
     हिरगर साहित्यिक बगालके नियमित साहित्यिक श्रंखला २४ भाग अबखरिक कैलालीके रमणीय सुन्दर नगरी टीकापुरसे करिब ४ किलोमिटर आघे नारायणपुर २ अम्बासा गाँउमन हुइना हुइलबा । साहित्यिक कार्यक्रम यहाँक परिबेशमन यी पहिलो हुइलेक मारे यी कार्यक्रमहे बरा गम्भीर ओ गँहिर से हेरगिलबावै । २९ गते बिहान १० बजेसे कार्यक्रम एकदम ठीक समयमननै कार्यक्रम चालुकरदर्ना कहिके कार्यक्रमके तयारी तिब्रगतिमन आघे बह्रलबा । करिब करिब कार्यक्रम के तयारी ९० प्रतिशत हुसेकल कहिके टीकापुर शाखाके अध्यक्ष अंकर चौधरी जनैलेबाटैँ । कार्यक्रम सहयोगमन स्थानिय क्लब ओ गाँउक बुद्धिजिबिनके फेन सक्रिय सहयोग हुइटिरहल जानकारी करैलेबाटैँ । टीकापुर बहुमुखि क्याम्पस ओ टीकापुर शाखा मिलके अबखरिक यी कार्यक्रमके आयोजना करलेबाटैँ । नेपालके लावा बरष के रुपमन मानजैना यी २०७३ सालहे बहाना बनाके शुभकामना आदनप्रदान ओ हिरगर साहित्यिक बगालके स्थापना हुइलेक ठीक एक बरष हुइलेक मारे बार्षिक उत्सबफेन उक्त कार्यक्रमहे बनैना कहिके जनागिलबा । उक्त कार्यक्रममन सहभागिता जनाइ चितवन, दांग, बाँके, बर्दिया, कैलाली,कंचनपुर सम्मके साहित्यकारनके ओ गायक पत्रकारन के उपस्थिति हुइना हुइलबा । कर्यक्रम मन सहभागिता हुइकलाग जिल्ला बहेरके पहुननके ऐना कार्यक्रम आजुसे हुइलागलबा । उक्त कार्यक्रममन बर्षिक प्रगति प्रतिबेदन, आयव्यय लगायत बार्षिक कार्यपत्रफेन प्रस्तुत कर्ना कहिके हिरगर बगाल केन्द्रिय शाखा जनैलेबात ।