छाईहन अच्कच्र शिक्षा काजे ?

छाईहन अच्कच्र शिक्षा काजे ?

विमला चौधरी
‘छाईछावा बराबर स्कूल पठाई सरासर’ कना नारा आजकाल हमार थारु समाजम सायद सक्कुओर लागू होस्याकल बा । तर छाईहन छावासरह छोर्वाकैक पह्रक्लाग अधिकार आम्ही निदेगैलक पाजैैठा । छाईहन पहर्ना अधिकार देगैलसेफे आपन घरायसी ओ सामाजिक संस्कार भित्तर रहिक पह्रपर्ना अवस्था बा । छावाहन स्याकटसम ऋण सापट लेकफे पह्रैना कोशिस कैजिठा कलसे छाईहन नाही । छावा पहर्नाक्रमम कबु फेल होगैलसे डाई, बाबा लगायत घरपरिवार हुँक्रफे धेर हौसला डेठ । एक्चो फेल हुईल्या त काहुईल द्वासरफ्यारा पास होजइब्या । आकुर मेहनत करस कैक । तर छाई कबु फेल हेगैलसे वाकर मनोबल झन घटैना मेह्रीक बाट बट्वाजैठा । आनक घर जैनाजात आप पहर्क का कब्र्या बेनसे सिलाईकटाई तालिम सिख उह काम लागी । छाई फेल हुईलसेकेल नाही हमार समाज म छाईहुँक्र मज्जा अंक लान्क एसएलसी पास हुईलसेफे उच्चशिक्षा पह्रैनाओर चासो निडेजाईट । तर छवाहन भरिकमज्जा क्याम्पस कहाँ बा जत्रा दुस पठैनाफे तयार होजैठी । ओत्रकेल नाही टेक्नीकल बिषय ओ पहर्क सेक्क जागीर पक्का मिल्ना पाछ धेररुप्या कमाई सेक्ना सपना डेख्क सरसापट खोज्कफे पह्रैना आँट कर्ठी । असिक करबेर छाईछावा बराबर कना नारा लागूहुइल बा कनाअस निलागट मही ।
हमार समाजम छाईहन १० कक्षासम पह्रादेना ओ भ्वाज कैदेना केल आपन कर्तब्य पूराहुईलक मन्ठी । उहमार १० कक्षासे उप्पर छाईछावाहन बराबर ब्यवहार कर निसेक्टी । १० कक्षा पासकरल धेर छाईहुँक्र उच्चशिक्षा नि पहर्क कि त भ्वाज करपर्ना कि त सीपमूलक तालिम सिखपर्ना प्रबृति होस्याकल बा । ब्यावसायिक तालिममफे और तालिम निलेक सिलाई तालिम केल कर्लक देख्जैठा । सीप विकास म जाओ उहाँफे सिलाई सिख्ना सक्कु थारु लवरियन, गाउँघरमफे सिलाई तालिमम सक्कु थारु लवरियन केल हौस्यार । बजारम सिलाई मेसिन किन्ना ठाउँमफे थारु लवरियनक भिडभाड देख्जैठा । का छाईहन सिलाइ बाहेक और धेर अम्दानी करसेक्ना ब्यावसायिक तालिम डिह निसेक्जाईट ? छाईहन उच्चशिक्षा पहर्नाम काजे रोक्जैठा त ? छाईहन १० कक्षा पास हुईटीकी डाईबाबा काजे भ्वाज कैडेना सोँचबनैठ लगायत धेउर प्रश्न म्वारमनम उब्जलागल । मइ यी प्रश्नक जवाफ कहाँजाक ओ केही पुछु कनाअस लागल तर आपन जर्मलठाउँ बाँकेक बैजापुरम जाक धेर दिदिबाबुहुँकनसे अस्तहेँ धेर प्रश्नक जवाफ पुछ्नु । तर हुँकन्हक जवाफ सुन्क एकहोर बरा खुसी लागल कलसे एकओर बैराग फे । काजेकी १० कक्षासम मजा अंक लान्क पासहुईल बाबु हुँक्रफे आपन ब्यावसाय सञ्चालन कैक बैठन बाट ।
बैजापुर १ बैशा म चन्द्रकली थारु एसएलसीम फेलहोक सिलाई सिख्ली ओ आजकाल सहयोगी टेलर नाउँ धैक आपन ब्यावसाय चलैल बाटी । छाईक सफलता डेख्क चन्द्रकलीक बाबा श्रीप्रसाद थारु कल छाईहन धेउर पह्राई नि सेक्लसेफे आपन मेहनतले स्वतन्त्र ब्यावसाय चलैल बा । ज्या हुईलसेफे आब मज्जा डमन्ड्वा पईना आशा कर्ल बाटु । हमार समाजम जनचेतनक कमी ओ आर्थिकअवस्था कमजोर हुईलक ओर्सेफे हुईसेक्ठा उच्च शिक्षा प्रहाई निसेक्क ब्यावसायिक तालिमओर धक्याल पर्ना । बैजापुर १ म टप टेलर सञ्चालन कर्लक बजारी थारुकठे आजकालफे सिलाई तालिम सिख्ना लवरियन टनाटन बाट । विगत आठ बर्षठेसे सिलाई ब्यावसाय कर्टी अईलक बजारी मासिक ५ सय शुल्क लेक आबसम करिब २ सयक हाराहारीम आपन सामुदाय लवरियन तालिम दे सेक्लक जनैली । उहाँसँग सिख्लक धेरजन आपल ब्यावसाय सञ्चालन कैक मजा आम्दानीफे कर्टी बाट । एसएलसी फेल होक ओ पास हुईल लवरियनफे आपनठे सिलाई सिखअईना कर्लक बजारी जनैली । ओसहँक बैजापुर २ बेलास पुरक गीता चौधरीफे एसएलसी फेल हुईलक झ्वाँकम बजारीक टेलरम सिलाई सिक्क आजकाल भवनियाँपुर आपन टेलर खोल्क मजा आम्दानी कर्लबाटी ।
आपन स्वतन्त्र पेशाम सन्टुष्ट रहलक हुँक्र जनैल । यी पेशा म धेउर लगानीफे कर निपरट । एक्ठो मसिन किन्ना वहेम मेहनट कर्लसे अपन्हे रुप्या फर्ठा बजारी खुसी हुईटी कली । अजकाल बैजापुरक हरेक थारु बस्तीम सिलाई निसिखल महिला हुँक्र कमबाट । उहाँ छाईक भ्वाज करबेर सिलाई मसिन प्रमुख दाईजोक रुपम देना परम्परा जो बन्स्याकल बा । चन्द्रकली, गीता ओ बजारी त बाँके बैजापुरक एक्ठो उदाहरणकेल हुईट । तर यी समस्या बाँकेम केल नाही पछिउँ तराईक दाङ, बर्दिया, कैलाली कञ्चनपुरमफे निहो कह निसेक्जाईट । असिकहमार थारु समुदायक लवरियन ब्यावसायिक सिलाइ पेशाम लाक्क आत्मनिर्भर हुईना हमार जसिन बोरोजगार मूलुकम सकारात्मक पक्षफे हो । तर औरओंर शिक्षक नजरले हेर्नाहो कलसे अईना दिनम उच्चशिक्षा पह्रल थारु महिला हुँकन्हक अभाव निहुई कह निसेक्जाई । काजेकी आजकालफे कौनो संघ संस्थाम अधिकृत तहक थारुमहिला मागल कलसे खोज्ना कर्रा पर्ठा । बरा अस्पतालम थारु महिला डक्टरक नाउँ कबुनी सुन्जाईट । सरकारी स्कूलम निमावि मावि तहसम थारु महिला शिक्षकफे गोटगाटकेल पाजैठ ।
यी सक्कु छाईहन अच्कच्र शिक्षा देलक ओर्सै हो जसिन लाग्ठा । काजेकी चाहाजत्रा बरा अवसर मिल्लसेफे आपनहन चहना हँथ्यार निहो कलसे कुछुनी लागत । अजकालफे हम्र मजासे ह्यार ओ स्वाँच सेक्ठी हाईस्कूलसम थारु समुदायक लवरिया विद्यार्थीनक संख्या उल्लेख्य बा । प्लस टु सम ओत्रा कमी निहुईट तर ओहीसे उप्पर हेर्लसे हरेक क्याम्पसम गोटगाटकेल बाट । उहफे छुटीउटी काम कैक आपन खर्च अप्न्हे जुटाक पहर्लक पाजैठा । असिक शिक्षित होक शिक्षित थारुसमाजक सम्भावना ब्वाकल भावी डाईहुँक्र अच्कच्र शिक्षा लेक और डगर लग्लसे हुँकन्हक भावी सन्ततीम कसिन असर परजाई? याकरलाग सक्कु अभिभावक लगायत थारु अगुवा बुद्धिजिबीहुँक्र गम्भीर होक स्वाँचपर्ना डेख्पर्ठा । छोटीमसे घरक सारा कामकाजम संलग्न होकफे छावा बराबर ओ कौनो जन त छावासे जित्तल नम्बर आन्क पह्रसेक्ठ कलसे छाईक मेन्हत हन काजे सम्मान निकैजाईट ? छावाहन पिएचडी करट सम डाईबाबक सहयोग मिलट कलसे छाईहन काजे निमिलट ? छावा ह पहर्क पक्का जागीर मिल्लसेकेल भ्वाज कर्ना सल्ला डेजैठा कलसे छाईक भ्वाज २० बर्षसे पहिल काजे ? का अस्टहे भेदभाव रहल ब्यवहार कर्लसे छाईछावा बराबर हुईहीं ? हमार थारु समुदायम अस्ट अस्ट धेर प्रश्नक ओ याकर जवाफ खोज्ना जरुरी बा ।