बाजुरम घर-घर जाके कोरोना परिक्षण ।

बाजुरम घर-घर जाके कोरोना परिक्षण ।

बाजुरा, २३ वैशाख ।                                                        बाजुरामे कोरोनाके दोसर लहर दिनप्रतिदिन बह्रटी बा । कोरोना संक्रमित दिनप्रतिदिन बह्रटी गिलपाछे स्वास्थ्यकर्मी घरमे पुुगके कोभिड जाँचसँगे उपचार तथा परामर्श डेटीरहल स्वास्थ्य कार्यालयके निमित्त कार्यालय प्रमुख महेश चन्द बटैठैं । जिल्लामे बुधसम १०८ कोरोना संक्रमित रहल बाटैं । उमध्ये एक महिलाके बुधके मृत्यु हुसेकल बा कलेसे चार जाने जिल्ला अस्पतालके आइसोलेशनमे उपचार कराइटैं ।

बाँकी सब होमआइसोलेशनमे ओ कुछ संक्रमित स्थानीय तहसे बनाइल आइसोलेशनमे स्वास्थ्यकर्मीके निगरानीमे बाटैं । गाउँगाउँमे कोभिड फैललपाछे स्वास्थ्य कार्यालय एन्टिजेन जाँच घरमे पुुगके करटैं । हिमाली गाउँपालिका–५ कवाडीमे जिल्ला स्वास्थ्य कार्यालयसे चिकित्सकसहित स्वास्थ्यकर्मीके टोली पठाके घरमे कोभिड जाँच तथा उपचार करटा ।

जिल्ला अस्पतालमे कार्यरत डा दीपेन्द्र बुढा, स्वास्थ्य कार्यालयमे कार्यरत ल्याब टेक्निसिएन रतन बुढा ओ जगत शाही कवाडी गाउँमे पुुगके जाँचसहित उपचार तथा परामर्श डेले रहे । उ गाउँपालिकामे कोरोना भाइरसके संक्रमण फैललपाछे स्वास्थ्यकर्मीके टोली गाउँ पुुगल हो ।

गाउँपालिकामे पुुगल चिकित्सक टोलीसे कोरोना संक्रमितहे उपचारसँगे उहाँहुकनहे परामर्शसमेत डेहल स्वास्थ्य कार्यालय जनैले बा । संक्रमित सबके स्वास्थ्य अवस्था सामान्य रहल बटागिल बा । उ गाउँपालिकामे पहिल चरणके कोरोना भाइरस संक्रमणके बेला एक जाने फेन संक्रमित नैरहैं । अब्बे दोसर लहरके कोरोना भाइरसके संक्रमणसे उ गाउँपालिकामे किल २० कोरोना संक्रमित रहल बाटैं ।

प्रमुख जिल्ला अधिकारी गोपालप्रसाद अधिकारी कोरोना संक्रमित दिनप्रतिदिन बह्रलबेला स्वास्थ्यकर्मीसे कोरोना संक्रमित बिरामीके जाँच ओ उपचार करटीरहल बटैलैं । जिल्लामे जोखिम बह्रै नैडेहक लाग जिल्लामे बुधसे यिहे वैशाख ३१ गतेसमके लाग निषेधज्ञासमेत करल बा ।

संक्रमितके मनोबल कम करना काम कोइहे नैकरना प्रजिअ अधिकारी आग्रह करले बाटैं। जिल्लामे चार कोभिड अस्पताल बा कलेसे ६५ आइसोलेशन शय्या बा । जिल्ला अस्पतालमे दुई भेन्टिलेटरसहित आइसीयू शय्या बा ।

  • – पहुरा पेज