सरकारी वार्ता टोली ओ थरुहट थारुवान संयुक्त संघर्ष समितिबीच छ बुँदे सहमति

सरकारी वार्ता टोली ओ थरुहट थारुवान संयुक्त संघर्ष समितिबीच छ बुँदे सहमति

काठमाडौं, १८ जेठ ।

सरकारी वार्ता टोली ओ थरुहट थारुवान संयुक्त संघर्ष समितिबीच आझ मंगलबार हुइल पाँचौ चरणके बार्ता ६ बुँदे सहमति हुइल बा । टीकापुर घटनाके आरोपमे लागल सक्कु मुद्दा फिर्ता कर्ना सहमति हुइल बा ।

सरकारी बार्ता टोलीके सदस्य डा. राजन भट्टराईके अनुसार कैलालीके टीकापुरमे हुइल दुःखद घटनामे आरोपिट धनीराम चौधरी, रेशमलाल चौधरी, लक्ष्मण थारु लगायतके सक्कु मुद्दा फिर्ता कर्ना सहमति बन्ल बा । तर ओकर लाग संविधान ओ कानूनसम्मत पहल कर्ना सहमति कैगैल बा ।

 

 

अस्टेके थरुहट आन्दोलनके  क्रममे शहीद होके राहत प्रदान करे छुटल परिवारहे राहत उपलब्ध करैना, शहीद परिवारके उचित व्यवस्थापन कर्ना, घाइते ओइनके उपचार कर्ना, आन्दोलनके क्रममे हुइल धनजन क्षतिके मूल्यांकन कैके क्षतिपूर्ति उपलब्ध करैना ओ महिला, असहाय ओइनमे हुइन दूव्र्यवहारके छानविन कैके कानूनी कारवाही प्रक्रिया आघे  बर्हैना सहमति हुइल बा ।

ओहे अनुसार संविधान करल व्यवस्थाअनुसार राज्यके  हरेक तह ओ निकायमे थारु समुदायके आरक्षणके व्यवस्था तथा संविधान डेहल सक्कु व्यवस्थाअनुरुप सहुलियत उपलब्ध करैना, थारु बाहुल्य हुइल क्षेत्रमे प्राथमिक तहसम मातृभाषामे पठन पाठन शुरु कैना, कमैया ओ कमलहरीसंग विगतमे सरकार करल सहमतिके कार्यान्वयन कर्ना औचित्य ओ आवश्यकताके आधारमे सक्कु पक्षसंग छलफल कैके संविधान संशोधनकके पहल कर्ना सहमति फेन हुइल डा. भट्टराई  बटलैं  ।

सिंहदरवारस्थित कानून न्याय तथा संसदीय मामिला मन्त्रालयमे हुइल वार्तामे सहमतिके मस्यौदा तयार हुइल थारु कल्याणकारिणीसभा (थाकस) के महामन्त्री तथा वार्ता टोलीके सदस्य प्रेमीलाल चौधरी गोरखापत्र अनलाइनहे जानकारी डेनैं । सरकार ओ थरुहट वार्ता टोलीबीच काल्ह सोमबार फेन चौथो चरणके वार्ता हुइल रहे ।

इहिसे आघे सरकार गृहमन्त्री रामबहादुर थापा बादलके संयोजकत्वमे बार्ता समिति बनाइल रहे । गृहमन्त्री थापा पदमुक्त हुइल बाद कानूनमन्त्री लीलानाथ श्रेष्ठहे वार्ताटोलीके संयोजकके जिम्मेवारी डेगैल बा ।

थाकसके  केन्द्रीय अध्यक्ष धनीराम चौधरीके संयोजकत्मे रहल  थरुहट थारुवान संयुक्त संघर्ष समिति इहिसे आघे १९ बुँदे माग ढारके धर्ना कार्यक्रम कैले रहे । ओहे मागहे सम्बोधन कर्ना सरकार तीन सदस्यीय वार्ता टोली गठन कैके वार्ता शुरु कैले रहे ।

सरकारी वार्ता टोलीमे प्रधानमन्त्रीके परराष्ट्र मामिला सल्लाहकार डा. राजन भट्टराई  ओ एमाले केन्द्रीय सदस्य भगवती चौधरी सदस्य बटैं । ओस्टेके थरुहट पक्षसे पूर्व सांसद रुक्मिणी चौधरीके संयोजकत्वमे पद्मनारायण चौधरी, प्रेमीलाल चौधरी, प्रभातकुमार चौधरी ओ चन्द्रप्रसाद चौधरी वार्ता समिति सदस्य बटैं । वार्ता अब्बे जारी बा ।